Un ano desde que os nosos concelleiros, Olaia Ledo e Geno Carballeira prometeran defender ao pobo de Narón. Un ano no que pasaron moitas cousas e onde desde o BNG traballamos cada día para que Narón e Galiza sexan mellores. Facémolo sen prevendas e para transformar, como escribía Castelao, os anceios en realidades e as realidades en feitos.
O grupo municipal do BNG de Narón segue preocupado nesta fase de desescalada polos accesos de toda a poboación ao espazo público e preocúpalles a falta de resposta "Ante as preguntas e rogos que facemos de se van a facilitar máis accesos da estrada da trincheira a resposta da alcaldesa é que "o están a mirar pero que non nos dan máis información por se non se fan" indica Geno Carballeira, concelleiro do BNG de Narón "preocúpanos tamén que non se dividan correctamente: por exemplo hai xente que ten dúbidas na mesma estrada da trincheira por onde poden pasar as bicis e por onde as persoas que pasean. Ademais hai que reparar os taboleiros do paseo marítimo da Gándara ou do parque de Freixeiro e outras incidencias. Pensamos que nisto hai que estar unida a oposición e o goberno pero de momento só nos atopamos con que Narón estase a quedar atrás se comparamos con outros concellos" indica a portavoz municipal, Olaia Ledo
Ademais, durante este tempo máis xente está a acceder e querer desfrutar das rúas e parques e segue a ser mio necesario un acondicionamento do parque de Pedroso, non só de limpeza. Parroquias como o Val seguen a ter problemas coa recollida de lixo (e non chega con que se vai solucionar no futuro co nova contratación de lixo cando o problema é xa no presente), o axeitamento seguro aos parques e paseos e outras demandas que desde o BNG intentamos facer chegar para dar solución desde o concello.
As mocións que presenta o grupo municipal do BNG de Narón, chegaron ao pleno deste xoves cos votos xa favorábeis de PsdeG e Tega polo que resultaron tamén aprobadas definitivamente unha vez rematada a sesión. Son dúas mocións (o máximo que en Narón ten permitido cada grupo municipal por pleno e que desde o BNG parécenos insuficiente para poder debatir e achegar propostas) centradas no ensino e na defensa do galego, a nosa lingua propia. Tamén presentaron unha batería de preguntas e rogos ao final sobre mobilidade e indicacións que lle achegan desde a veciñanza para dar a coñecer estas demandas ao grupo de goberno.
Esta semana é moi importante para o #ComercioLocal de todo o país, porque despois de case dous meses abren as portas moitos comercios que pecharan. Fano coas medidas de protección axeitadas. En Narón temos todo o necesario e todo sae ben cando mercamos no noso concello.
🌈 TODO SAE BEN CANDO MERCAMOS EN #NARÓN
O BNG de Narón vén de falar con diferentes axentes e persoas a título individual que manifestan o temor de saír á rúa nas zonas urbanas da cidade en condicións de seguridade pola masificación dos espazos en determinadas franxas horarias. Esixen unha cidade onde o espazo público sexa un ben de primeira necesidade e o benestar das persoas o centro.
30 de Abril de 2020. Falamos de medidas sociais e fiscais necesarias para saír da crise sanitaria e afrontar da mellor maneira posíbel a crise económica que temos ás portas, e que algúns xa están a vivir: ERTES, despidos, reduccións de xornadas laborais... Lembremos que o noso país, e o noso concello dentro del, é un país moi productivo que ten moitos sectores laborais, o sector do mar (do que tamén falamos neste pasado pleno), sector agro gandeiro, tecido industrial moi variado, etc..
O Concello está a tomar medidas, moitas delas propostas polo BNG dende o inicio da pandemia, dentro das súas competencias, medidas sociais e fiscais para axudar á veciñanza; pero tamén anuncia outras que quedan moi ben na portada do xornal, pero que non son competencia do Concello, se nón do Goberno da Xunta, e que son un parche que non vai axudar a que os negocios teñan que pechar as súas portas.
Dende o BNG coidamos que a participación cidadá no ámbito político-administrativo, ademais de ser un dereito fundamental da cidadanía, é unha ferramenta indispensábel para o bo funcionamento da democracia.
O concello de Narón anuncia que estudará as medidas presentadas polo BNG nun pleno virtual por mor do estado de alarma.
O BNG de Narón presentou unha batería de medidas para incluír no traballo do Concello ao que angadiu unha máis das presentadas esta semana na que se pedía que o concello de Narón facilitara residencia e hoteis para o persoal traballador do concello que conviven con persoas de risco polo virus e que estean expostos polo seu traballo como pode ser a policía local, o servizo de voluntariado ou o SPEIS. As medidas inclúen desde protocolos para a violencia machista, as persoas sen fogar ou medidas fiscais para empresas e particulares. “Todas elas estanse a presentar desde a seriedade e desde o estudo do gabinete de crise que no BNG temos con persoas expertas en cada tema, son factibles xa que de feito concellos como Pontevedra, Allariz ou Tomiño por citar tres exemplos estanas a levar a cabo na súa totalidade” indica Olaia Ledo, portavoz municipal do BNG de Narón
A enmenda do BNG ao Regulamento de Participación Cidadá de Narón, no que se pedía que a cidadanía puidera intervir nas mocións políticas, non sae aprobada pola mínima nun pleno realizado virtualmente e onde non puido participar a poboación.
Hoxe en Narón fíxose un pleno atípico debido ao estado de alarma. Foi telemático e non aberto á cidadanía e por iso desde o BNG “queremos agradecer que fose posible grazas ao traballo do persoal do concello, desde secretaría e intervención pasando polas persoas informáticas pero salientamos que é incomprensible que se incluíra a aprobación definitiva do Regulamento de Participación Cidadá xusto nun pleno no que non pode participar ou asistir a poboación. É por iso que tamén presentamos unha enmenda para que todas as persoas poidan participar nos plenos en calquera moción política e que conste en acta, algo que se pode facer por exemplo en Ferrol pero non en Narón”. Indica Olaia Ledo, portavoz do BNG. Un dato curioso da situación é que o PSOE que leva esa área no concello dividiu a votación: o seu voceiro votou a favor da moción, a concelleira de participación en contra e o outro concelleiro en contra aclarando que estaba dacordo. A votación ficou finalmente con 9 votos a favor de incluír a moción e 11 en contra. “A participación cidadá seguirá a ser escasa nos plenos municipais , o lugar onde todas temos que sentirnos representadas, sen despotismos“ indica Geno Carballeira, concelleiro do BNG que interviu no pleno neste punto.
O BNG de Narón vese na obriga de absterse na votación do POS pola falta de información do goberno até hoxe dez minutos antes do inicio do Pleno. O mesmo aconteceu cos acordos relativos ao processo de saneamento.
Esta mañá tivo lugar o último pleno de Narón e a única moción presentada foi aprobada coas únicas abstencións do PP. O colectivo Avante Ferrolterra interveu no pleno para visibilizar a súa loita e a situación que teñen que vivir no día a días as persoas do colectivo.
“Foi un día importante para Narón” declara Olaia Ledo, voceira do BNG “de cumprirse o aprobado no pleno, o 2020 xa será un pouco mellor que o 2019 na loita por unha igualdade real para todas as persoas. As administracións temos a obriga de lexislar, traballar, colaborar e escoitar para avanzar na visibilidade da sociedade diversa que xa somos de facto”. Desde o BNG somos conscientes de que a moción é só un paso e que os verdadeiros cambios virán nas accións do día a día, no recoñecemento das múltiples identidades.
