Rexistramos propostas para os orzamentos do concello de Narón onde reclamamos partidas que inclúan “investimentos necesarios para que Narón avance. Facémolo defendendo un proxecto claro”, declara a nosa portavoz municipal Olaia Ledo.

No documento presentado reclamamos diferentes actuacións no concello en canto a servizos sociais, accesibilidade, infraestruturas, medio ambiente, igualdade... todas elas explicadas nun documento e que desde o BNG consideramos imprescindíbeis para mellorar Narón. Os investimentos van desde cuestións concretas coma ampliar os vestiarios de Río Seco ou renovar o tellado do centro Manuela Pérez Sequeiros a outras transversais coma destinar o 1% dos orzamentos totais á loita pola igualdade. “En Narón non somos alleos á crise actual e o concello debe mirar atendendo uns servizos que cubran as necesidades da maioría social e, tamén, poñendo o foco no espazo público. Isto último é un tema pendente no noso concello e a medio facer. Falamos dun traballo para os vindeiros catro anos”, indica Olaia Ledo.

As nosas propostas inclúen actuacións en todos os barrios e parroquias e divídense en infraestruturas, servizos sociais, deporte, rural, medio ambiente, cultura e patrimonio, servizos sociais, accesibilidade e mobilidade e pasan pola creación dun Centro de Información á Muller; un novo centro de Día; un proxecto para o antigo Centro de Saúde; unha nova piscina climatizada ou transformar as naves da Feira do Trece nun espazo de exposicións e feiras de toda clase.