A nosa voceira, Olaia Ledo, advertiu de que o grupo municipal do BNG está a estudar co equipo xurídico a interposición dun recurso contencioso-administrativo se o Goberno local ignora este último requirimento. "Se o Concello segue adiante cunha licitación que o propio acordo recoñece que non ten os custos fixados nin o aval da Intervención, verémonos na obriga de abrir novas vías das que xa nos asesoramos xuridicamente” afirmou Ledo “para protexer os intereses da veciñanza e a estabilidade financeira de Narón”. Ante a gravidade das incertezas admitidas polos propios informes técnicos, solicitamos formalmente a paralización de calquera acto de preparación da licitación ata que os custos de ACUAES e o escenario post-2026 estean fixados mediante convenios firmes.

Incertezas que hipotecan o futuro de Narón

No escrito de oposición rexistrado, sinalamos catro puntos críticos que invalidan o procedemento actual: veto á xestión pública (o Goberno de Marián Ferreiro cualificou de "exorbitante" a xestión pública do servizo sen un estudo que o demostre. Isto lévanos a denunciar que a posición  crea un escenario de “incerteza crítica” o que podería provocar futuras reclamacións de equilibrio económico por parte da empresa privada a cargo do diñeiro público); falta de aval da Intervención (o acordo certificado admite que a Intervención Xeral "non pode pronunciarse sobre a valoración cuantitativa" da sustentabilidade financeira. Para nós, é inaceptable delegar esta responsabilidade nun estudo futuro (EVAF) cando debería ser a base para elixir o modelo de xestión); escenario de custos descoñecido (o Concello recoñece que o cambio de marco na depuración (EDAR Cabo Prioriño) a partir de 2026 é unha variable de "suficiente importancia" aínda non cuantificada); custos ocultos de ACUAES (denunciamos que se omitiron custos estruturais de amortización de interceptores que o operador actual (COSMA) xa asume, o que falsea a comparativa económica para prexudicar a opción da xestión pública directa). "Non imos permitir que as présas do Goberno local por privatizar un servizo esencial acaben derivando en futuras reclamacións económicas das empresas adxudicatarias a cargo das arcas públicas e do peto da veciñanza e por iso presentamos este novo requerimento confiando na vía administrativa e reclamando que o se inclúa ao expediente a nosa oposición como Grupo Municipal", concluíu Olaia Ledo.