A portavoz municipal do BNG, Olaia Ledo Díaz, critica duramente a postura do goberno, sinalando que "Narón ten unha débeda histórica e uns problemas de control evidentes coa actual concesionaria. No canto de aproveitar a extinción do contrato para recuperar o control público sobre un servizo esencial, TEGA e PP poñen a alfombra vermella para instalar unha 'COSMA II', garantindo os beneficios privados a costa dos cartos públicos e da calidade do servizo". "O Partido Popular coa súa abstención é un aval para que TEGA siga a afondar na xestión indirecta, demostrando que son o mesmo cando se trata de privatizar servizos básicos" afirman no BNG.

O BNG insiste en que a xestión directa (sexa a través dun organismo autónomo ou unha sociedade mercantil pública) é a vía máis eficiente e transparente a longo prazo. "O servizo da auga é un dereito, non un negocio. Continuar coa concesión é perpetuar os mecanismos de opacidade e poñer o lucro por riba do benestar da veciñanza de Narón." Afirman ademais que esta proposta xa ía no seu programa electoral e que levan traballando por esta alternativa desde o 2020 con diferentes axentes e persoal técnico poñendo en coñecemento esta proposta ao Concello desde aquela.

Os Puntos Clave da Denuncia do BNG:

• Rexeitamento da Xestión Directa: A proposta aprobada pola maioría na Xunta de Portavoces (cos votos a favor de TEGA e a abstención do PP) rexeita de plano a alternativa da xestión directa que permitiría o reinvestimento íntegro dos beneficios na mellora da rede e non nos dividendos dunha empresa privada.
• Insuficiencia da Xestión Actual: A pesar da experiencia negativa coa concesión actual —cuxos problemas de xestión e débedas aínda non foron completamente liquidadas, como reflicte a dación de conta do punto 9 da orde do día do Pleno ordinario de novembro, o Concello basea a súa decisión nunha "memoria de eficiencia" externa que, de facto, só xustifica o modelo concesional.