Desde o BNG de Narón, presentamos á última hora da mañá do 13 de agosto, alegacións ao Plan Xeral Municipal. O periodo de alegacións remata o 15 deste mes “facemos as alegacións despois de asesorarnos tecnicamente e sendo conscientes de que o PXOM ao final non soluciona nada se non contamos coa vontade política. Este plans ao final son moi extensos, cun custe elevado e no que só con plans de mobilidade, plans específicos para cada zona pódese trazar un Narón máis amábel. Por todos isto pedimos que este documento recolla todas as necesidades do Narón do presente e do futuro e propoña solucións a situacións non desexábeis que acontecen de longo no noso concello.” Afirma Olaia Ledo,  a nosa voceira municipal do BNG

Para o BNG, consolidar o solo urbanizábel e os núcleos rurais deben ser unha prioridade no plan xeral. Ademais, reclamamos que se inclúa un plan específico para a Estrada de Castela que permita que as vivendas tradicionais e de valor patrimonial desa rúa estean dentro da ordenación “porque son parte do noso patrimonio e porque esta Estrada precisa de máis servizos dotacionais. Queremos que sexa unha rúa que una a todo Narón” declara Ledo.

En todas as alegacións facemos fincapé en que o espazo público estea dotado de servizos que fagan que a veciñanza poida gozar del e permita promover o comercio local. Ademais pedimos unha infraestrutura verde urbana que conecte os barrios “e non teñamos que desprazarnos a un parque para poder gozar do espazo público se non que o poidamos facer en canto saiamos do noso piso ou casa. Reclamamos, en definitiva, que no PXOM quede recollido a necesidade de plans directores en todos os barrios e parroquias e que o rural contemple núcleos en cada parroquia que acheguen servizos e dotacións ao rural” . 

A Cementeira de Castro e un depósito de refugallos en Pedroso no centro das alegacións.

 e

No BNG consideramos que é necesario mudar a cualificación de solos urbanizábeis aos terreos contiguos da cementeira. Alegamos que están na contorna dun polígono cun uso industrial inferior ao 50% de capacidade é que nunca van ser usados como tal “queren denominar solo urbanizábel para uso industrial a unha zona forestal sen existencia ningunha de servizos de urbanizacións dos mesmos e incumprindo, segundo nos asesoraron tecnicamente, coa regulamentación autonómica referente a estradas e infraestruturas de comunicación. Alega o concello que agora os veciños van ter uns terreos que valen máis pero o que non di TEGA e que sasbe perfectamente que eses terreos nunca se van usar. Desde o BNG denunciamos e denunciaremos esta situación” Declara Olaia Ledo. "Ademais, desde o BNG reclamamos un estudo das contraindicacións de ter unha industria contaminante pegado a núcleos rurais, núcleos que a propia lei do solo reclama protexer".

Por outra banda, a respecto ao depósito que a Xunta de Galiza permite a industria MEGASA en Pedroso, no BNG reclamamos que se protexan os terreos rústicos agropecuarios de especial protección que a rodea e que revisen se segue a ser legal un depósito que o plan xeral denomina “infraestrutura” “non é unha infraestutura, simplemente denomínase así para darlle cobertura legal no novo PXOM ao que como moito é unha escombreira nunha antiga canteira e que agora cubriron e chega a ser unha montaña, tapar eses escombros e non permitir que contamine os regatos e mesmo o río Grande de Xuvia é necesario” explica Ledo.