“Facemos o acto como un punto de encontro para que os veciños e veciñas saiban dos seus dereitos agora que a luz nola cobran a prezo de ouro” indica Marta Grandal, a nosa responsábel local. O acto estará presentado pola portavoz municipal, Olaia Ledo, e contará coas ponencias do deputado do BNG ao parlamento Galego pola comarca Mon Fernández  e o técnico en enerxías renovábeis, Xosé Manuel Golpe.

“O ano pasado as tres principais eléctricas tiñan 6.500 millóns de euros de beneficio e hoxe o MW/h cóbrannolo a 350 € cando xusto hai un ano estaba a 50 €. Temos unha estafa legalizada forrándose os amigos de Feijóo e de Sánchez e a xente ten que coñecer os seus dereitos e o que deberan ser os beneficios para as galegas e galegos cando xeramos enerxía eléctrica a esgalla. Non ten sentido que aquí só quede a contaminación e a factura de luz máis cara do estado” indica Olaia Ledo.

O acto englóbase na campaña que fai o BNG informativa e de recollida de sinaturas sobre a estafa das eléctricas e tamén sobre o boom eólico en Galiza “en principio as repotenciacións é o que se debera primar á hora de novos parques mais iso non significa que a veciñanza non estea informada das consecuencias ou do escaso tempo que ten para facer alegacións” declara Ledo.