O domingo 11 de febreiro ás 10:30h a candidata á Xunta de Galiza, Ana Pontón Mondelo fixo unha parada no Pazo da Cultura de Narón para un encontro sectorial coas anpas de todos os ceips, o CRA de Narón e o CPI “O Feal”. Nun debate de ideas, Ana Pontón, presentou o programa do BNG en materia de ensino e fixo unha parada especial nas necesidades de garantir a igualdade de oportunidades, a equidade e a atención á diversidade en todos os niveis educativos; mudar o modelo de transporte mixto que iniciou a Xunta do Partido Popular; rebaixar a ratio do alumnado; procurar un sistema educativo que conciba a educación como servizo público dos 0 aos 18 anos e, ademais, fixo especial mención ás necesidades de conciliación para as familias. Para isto, o BNG presentou unha das súas medidas recollidas no programa electoral sobre un “servizo público de coidados de menores a domicilio até os 12 anos para cubrir necesidades de conciliación de natureza extraordinaria cando un neno ou nena non poida ir á escola por motivos diversos”

A candidata á presidencia da Xunta, Ana Pontón agradeceu o traballo ás anpas “facedes un traballo esencial no ensino para a súa democratización e para que os nenos e nenas teñan o que merecen, ademais usades o voso tempo libre para o colectivo e iso é moi importante salientalo”.

O BNG, para facilitar que todas as anpas acudisen habilitou un espazo infantil nas instalacións do Pazo da Cultura.